Deputetja e Partisë Demokratike të Kosovës, Vlora Çitaku e ka vlerësuar alarmante situatën në Kosovë, pas shkyçjes nga rrjeti i energjisë elektrike të mbi 1400 pikave matëse të konsumatorëve komercialë që nuk kanë lidhur marrëveshje me një furnizues.
Sipas saj, ky është vetëm vazhdimi i përpjekjeve të qëllimshme të lidershipit të LVV-së dhe vartësve të tyre për të shkatërruar sektorin privat.
Ajo ka theksuar se Kosova është duke u përballur edhe me rrezikun e papunësisë masive ‘si pasojë e vendimeve rrënuese të Kurtit dhe klikës së tij në ZRRE’.
“1400 biznese, kryesisht prodhues, po shkyçen me dhunë nga rrjeti i energjisë elektrike. Mijëra punëtorë rrezikojnë të mbesin pa vende pune, pa të ardhura për veten dhe familjet e tyre. Qytetari i Kosovës, i rraskapitur nga çmimet e larta të produkteve bazike dhe energjisë, sot po përballet edhe me rrezikun e papunësisë masive, si pasojë e vendimeve rrënuese të Kurtit dhe klikës së tij në ZRRE. Situata është alarmante. Ky është vetëm vazhdimi i përpjekjeve të qëllimshme të lidershipit të LVV-së dhe vartësve të tyre për të shkatërruar sektorin privat, ashtu siç kanë bërë me institucionet e pavarura. Kjo mendësi totalitare i përket shekullit të kaluar, dhe shoqëria jonë nuk do ta tolerojë”, ka shkruar Çitaku në Facebook.
