Eugen Cakolli, nga Instituti Demokratik i Kosovës, ka reaguar ndaj moscertifikimit të dy subjekteve politike për zgjedhjet lokale të tetorit, duke e quajtur kundërligjore e të pakuptimtë vendimin e Komisionit Qendror të Zgjedhjeve.
Përmes një postimi në Facebook, Cakolli ka thënë se kjo është thjesht burokraci e shndërruar në censurë.
Sipas tij, se është e papranueshme që të refuzohen subjekte për gabime gjuhësore dhe se ngjashmërisë me sloganin e një partie tjetër.
Postimi i plotë i Cakollit
KQZ-ja vazhdoi sot me praktikën kundërligjore e të pakuptimtë, të cenimit të së drejtës kushtetuese të subjekteve për pjesëmarrje në zgjedhje – vetëm për shkak të emrit të tyre.
Një iniciativë qenka refuzuar sepse emri i saj i ngjante një slogani të LDK-së të vitit 2017 – me insistim të kësaj të fundit. Një tjetër u refuzua për një gabim drejtshkrimor.
Kjo është thjesht burokraci e shndërruar në censurë.
E drejta për të garuar është themel i demokracisë.
Asnjë parti nuk ka monopolin mbi brendet apo kujtimet e fushatave.
Për më keq, është e papranueshme të refuzohen subjekte për gabime gjuhësore, thua ti se anëtarët e KQZ-së janë lektorë.
Rregullat duhet të zbatohen me barazi, jo sipas tekeve apo interesave të përfaqësuesve partiakë në KQZ.
Ndryshe, të shtunën KQZ-ja nuk e certifikoi iniciativën “Lidhja për Prishtinën” pasi u tha se ka ngjashmëri me brendin dhe identitetin historik të Lidhjes Demokratike të Kosovës. Ndërsa, “Lëvizja për bashkimin e shqipëtarëve” nuk u certifikua për shkak të gabimit drejtshkrimor./teve1.info/
