Gara për kryetarin e Gjilanit po vlerësohet se do të zhvillohet ndërmjet Lëvizjes Vetëvendosje me kandidatin Alban Hysenin dhe Lidhjes Demokratike të Kosovës me Arbër Ismajli.
Sipas analistëve në “Këndin e Debatit” në Tëvë1, në këtë komunë gjasat që ketë balotazh janë të mëdha, por që favorit llogaritet kandidati i VV-së dhe kryetari aktual, Alban Hyseni.
“Gara është mes VV-së dhe LDK-së, e shoh Gjilanin në balotazh por e shoh Alban Hysenin fitues”, ka thënë gazetari Florent Zeqa.
Kenan Gashi nga “Avonet”, ka thënë se LDK ka pasur figura më të mira për t’i kandiduar për kryetar.
Ai ka thënë se Ismajli nuk ka pasur ndonjë rezultat as si nënkryetar i komunës.
“Albani nuk është që ka sjell ndonjë rezultat të veçantë, megjithatë në realizimin e premtimeve qëndron mirë. Është njëri prej kandidatëve më të keq që ka mundur të ketë LDK-ja. Në Gjilan LDK ka shumë figura. Shkon në balotazh, Albani dhe Arbëri, sigurt fiton Alban Hyseni”, ka thënë ai.
Konsulenti politik, Xhevdet Pozhari ka thënë se Alban Hyseni mund të fitojë pa balotazh. Ai ka vlerësuar se ish-kryetari i kësaj komune Lutfi Haziri ka qenë në dijeni se do ta humbë garën dhe për këtë arsye nuk ka kandiduar.
“Mendoj se Alban Hyseni mund të fitojë pa balotazh. Sikur të ishte Lutfi Haziri gara do të ishte më interesante. Haziri e dinte që do të humbë, mund të ketë pas sondazhet që i kanë partitë dhe mos të humbë dy herë nga Alban Hyseni”, është shprehur Pozhari.
Dorajet Imeri, analist politik ka thënë se në çdo komunë ku do të ketë balotazh, kandidatët e VV-së janë të favorizuar.
“Nëse shkohet në balotazh kandidatët e LVV-së mund të favorizohet për shkak të kryetarit të partisë, përkatësisht kryeministrit Kurti. Nuk ka kandidat që do të ishte i rrezikshëm për nivelin e tij”, ka vlerësuar ai.
Arta Tahiri –Beqa, politologe thotë se kryetari i Gjilanit nuk e ka pasur mbështetjen e madhe nga qendra, ashtu siç e ka pas sipas saj, Podujeva.
“Alban Hyseni nuk është mbështetur shumë nga qendra, siç ka ndodhë në Podujevë. Nuk do bëja një neutralizim të situatës që vërtetë mund të fitonte pa balotazh për arsye se ka shumë rëndësi ndonjëherë kandidati por edhe partia. Por sigurisht që do të doja që Alban Hyseni të fitonte i cili bëri sakrificë pasi mori shumë vota për deputetë dhe kandidojë për kryetar dhe e bëri kthesën në këtë komunë”, ka thënë ajo.
