Një oficer korrektues është arrestuar e pezulluar nga puna për shkak të arratisjes së një serbi nga paraburgimi në Mitrovicë.
Kështu ka bërë të ditur ministrja në detyrë e Drejtësisë, Albulena Haxhiu, e cila tha se me këtë rast, numri i zyrtarëve të pezulluar arrin në gjashtë, duke përfshirë drejtorin e Qendrës, një mbikëqyrës i lartë dhe katër zyrtarë korrektues.
“Si Ministre e Drejtësisë, ritheksoj se askush nuk është mbi ligjin. Çdo shkelje do të trajtohet me vendosmëri, duke garantuar llogaridhënie dhe siguri në të gjitha institucionet korrektuese”, ka shkruar Haxhiu në Facebook.
I burgosuri D.R., i cili ishte dënuar me 14 vjet e 6 muaj burgim – nga të cilat i kishin mbetur edhe 3 vjet e 7 muaj – ka arritur të arratiset nga ambientet e institucionit, ndërsa ishte duke punuar në hapësirat e punëtorisë. Sipas SHKK-së, ai ishte i kategorizuar si i avancuar dhe ndodhej në listën e të burgosurve që mund të përfitonin lirimin me kusht.
Arratisja e tij ka ndodhur në rrethana që ende nuk janë plotësisht të qarta, dhe menjëherë pas konstatimit të mungesës së tij, janë aktivizuar të gjitha procedurat e brendshme operacionale, ndërkohë që janë njoftuar institucionet relevante të sigurisë.
Në një deklaratë për Tëvë1, Shërbimi Korrektues i Kosovës ka konfirmuar se janë nisur hetimet e brendshme për zbardhjen e plotë të rastit dhe paralajmëroi se do të merren të gjitha masat e nevojshme në përputhje me legjislacionin në fuqi.
