Deputeti i Lidhjes Demokratike të Kosovës (LDK), Lutfi Haziri, ka treguar se në një rast të kaluar ka pranuar që ta jap votën e tij për formimin e Kuvendit pa asnjë kusht, duke iu referuar situatës kur Lëvizja Vetëvendosje (LVV) kishte deklaruar se i kishte votat për Qeveri, por i mungonte një votë për Kuvend.
Në emisionin “Këndi i Debatit” në Tëvë1, Haziri tha se ka qenë i gatshëm ta jepte votën e tij vullnetarisht, pa vendosur ndonjë kusht politik.
“E di që është thënë se i kam votat për Qeveri, por më duhet edhe një votë për Kuvend. Kam qenë unë ai i cili kam thënë se e jap votën edhe atë pa kushte,” tha Haziri.
I pyetur nëse ka pasur ndonjë tentativë që dikush ta kontaktojë për këtë votë, Haziri u shpreh se kjo nuk ka rëndësi, por theksoi se mënyra se si është ndërtuar shumica parlamentare ka lënë të kuptohet për një “korruptim politik”.
“Nuk ka kurrfarë rëndësie kjo, por problemi është se me vetë faktin se si është ndërtuar shumica parlamentare që në fillim të lenë me kuptu korruptim politik. Me vetë faktin që nuk ka marrëveshje politike… Unë besoj që partia e parë e ka shumë lehtë të krijojë marrëveshje politike me grupe të vogla, me individ dhe me deputetë, por jo me mënyra të tjera,” tha ai.
Haziri theksoi se vota duhet të jetë pjesë e një marrëveshjeje politike dhe jo e pazareve të interesit personal.
“Kur veç ti tani ia jep votën vet, ia jep votën dhe pastaj thonë ‘këtë e kemi ble me çmim ministri, me çmim tenderi, e ku ta di unë çka’. Nuk duhet të luftohet për të krijuar shumicë parlamentare me këmbim të tillë,” tha ai.
