Spahija për Tëvë1 bëri të ditur se moshat e reja janë ato që ulin konsumimin e duhanit gjatë kohës kur bëhet rritja e taksave, kjo sipas tij, ndodh për shkak të hyrave më të vogla që ata posedojnë në krahasim me moshat më madhore.
“Diku rreth 3 deri në 3.5 milionë kilogram duhan shpenzohen brenda një viti në Kosovë. Janë shifra tejet të larta. Ulja e konsumimit të duhanit kur rriten taksat, është më shumë e vërejtur te moshat e reja, për shkak se ata kanë të hyra më të ulëta, dhe janë më pak të varur nga duhani”, tha ai në emisionin “Ditari”.
Spahija tutje theksoi se tema e këtij viti në Ditën Botërore kundër duhanit pasqyrohet me moton “Mbrojeni mjedisin”,
“Tema e sivjetme e ditës botërore pa duhan, është “Mbrojeni mjedisin”, sepse përveç pasojave shëndetësore që shkakton konsumimi i duhanit, dëmton edhe mjedisin”, tha ai.
Çdo vit në 31 maj Organizata Botërore e Shëndetësisë dhe partnerët e saj, duke i theksuar rreziqet ndaj shëndetit që burojnë nga përdorimi i duhanit dhe duke promovuar politika efektive për zvogëlimin e përdorimit të duhanit, e shënojnë Ditën Botërore të luftës kundër duhanit.
