Ka disa muaj që semaforët janë të vendosur në lagjen “Pejton” të Prishtinës.
Por, po të njëjtin ende nuk janë lëshuar në funksion.
Sipas njohësit të komunikacionit Lavdim Hamiti, semaforët nuk janë e vetmja zgjidhje për të lehtësuar trafikun në kryeqytet, e sidomos në këtë zonë.
“Nuk e di cfarë analize kanë bërë për këtë kryqëzim te Ramiz Sadiku, por semafori aty vetëm që e bllokon edhe më tepër komunikacionin. Se sikur të ishte rruga një kahore që ka qenë nga aty atëherë e ka funksionin e vet sepse shërben si rrugë një kahore nuk kemi bllokim të komunikacionit se shërben semafori. Ka qenë rrugë një kahore shërben semafori nuk kemi bllokim të komunikacionit, por prapë e kthyen në rrugë dy kahore sikur që është tash aty atëherë është vetëm një kaos, semafori e rregullon komunikacionin por ngarkesën nuk e largon”, tha Hamiti.
Edhe sipas asamblistit të Vetëvendosjes në kryeqytet, Faton Zekës këta semaforë janë vendosur vetëm sa për sy e faqe.
“I kemi dy pika në Prishtinë që kanë semafor por që nuk janë në funksion është kjo të Ramiz Sadiku dhe një është te shkolla “Iliria”, është e habitshme se qëllimi i semaforëve është të jenë në funksion. Po arsyen që nuk janë vënë në funksion nuk e di. Ndoshta janë krijuar për tu dukur se po kryejnë punë se shpesh herë Komuna po bënë punë që nuk po krijojnë zgjidhje por vetëm sa për të kryer punë e sidomos para fushatave zgjedhore”, deklaroi Zeka.
Ndërkaq, për këto vonesa, nga komuna e Prishtinës e kanë një arsyetim.
“Po punojmë edhe në kyçjen e disa nyejve semaforike që është tek Tokbahqja, te rruga “ Isa Kastrati” dhe tek lagjia “Pejton”. Megjithatë, ka pasur disa vonesa prej operatorëve ekomonik, nëse të njëjtin nuk arrijnë që ti kyçin pra nyje sidomos këtë tek Tokbahqja dhe pjesën te “Pejtoni”, atëherë sigurisht që do të ketë edhe penallti për këta operatorët ekonomik e që në rastin më të keq është shkëputja e kontratës sepse disa vërejtje veç se i kemi dhënë dhe ka një afat që deri në fundin e këtij muaji të përmbyllen këto nyje”, tha Donat Lushaku nga Drejtoria për Mobilitet.
Madje sipas Luashakut, nyje semaforike do të vendosen edhe në pjesë të tjera të kryeqytetit.
