Ministria e Drejtësisë e Serbisë ka thënë të shtunën se marrëveshja për pranimin e fajësisë për nxitje të përçarjes dhe mosdurimit nga zyrtari serb, Igor Popoviq, para gjykatës në Prishtinë ka ndodhur “nën presion, dhe jo me vullnetin e tij të lirë”.
Megjithatë, ajo nuk dha asnjë provë për të mbështetur petendimin se Popoviq e pranoi fajësinë nën presion.
“Ne theksojmë se nënshkrimi dhe përdorimi i marrëveshjeve për pranimin e fajësisë në një rast të tillë shërben ekskluzivisht si një mjet për stigmatizim shtesë të popullit serb dhe forcimin e kontrollit politik, dhe jo si një instrument i sundimit të ligjit”, thuhet në reagimin e Ministrisë serbe.
Përveç kësaj, siç theksohet, vetë marrëveshja është e pavlefshme pasi është lidhur nën detyrim dhe në kushte të shkeljes së të drejtave themelore të garantuara me Rezolutën 1244 dhe me Kartën e OKB-së për të Drejtat e Njeriut.
“Ministria e Drejtësisë paralajmëron se vazhdimi i abuzimeve me sistemin gjyqësor në Kosovë përbën shkelje të rëndë dhe të organizuar të së drejtës ndërkombëtare dhe një sulm të drejtpërdrejtë ndaj të drejtave dhe lirive themelore të popullit serb. Për këtë arsye, Republika e Serbisë do të përdorë të gjitha mjetet juridike dhe politike për të mbrojtur Igor Popoviqin dhe për ta zbuluar para bashkësisë ndërkombëtare këtë padrejtësi të rëndë,” thuhet në njoftim.
Ndryshe, Gjykata Themelore në Prishtinë e dënoi të premten Popoviqin me gjashtë muaj burgim për nxitje të përçarjes dhe mosdurimit, dënim që iu zëvendësua me një gjobë prej 3.000 eurosh, si dhe ia ndaloi hyrjen në Kosovë për dy vjet.
Popoviq – i cili është ndihmës i drejtorit të Zyrës për Kosovën në Qeverinë serbe – kishte arritur marrëveshje me Prokurorinë Sepciale të Kosovës për pranimin e fajësisë për nxitje dhe përhapje të urrejtje dhe mosdurimit ndërmjet grupeve etnike, gjatë një fjalimi të mbajtur në Hoçë të Madhe të Rahovecit më 18 korrik.
Gjatë atij fjalimi, Popoviq, ndër të tjera, e kishte cilësuar Ushtrinë Çlirimtare të Kosovës “organizatë terroriste”.
