Deputeti i Partisë Demokratike të Kosovës, Fadil Demaku ka thënë se protesta e sotme kundër Gjykatës Speciale do të ketë efekt.
Ai ka thënë se kjo protestë në të cilën morën pjesë mijëra qytetarë është mesazh për institucionet tona por edhe ndërkombëtare se procesi në Gjykatën Speciale ka devijuar.
Demaku i cili kishte votuar kundër kësaj gjykate ka thënë se kjo gjykatë është duke u përdorur me qëllime të caktuara për devijim të procesit.
“Pjesëmarrja masive e qytetarëve tregon që patjetër do të ketë efekt, patjetër do të lëvizet në drejtimin e duhur nga të gjithë akterët që janë të thirrur të mbrojte të drejtësisë, duke filluar në radhë të parë nga institucionet tona, por duke dërguar edhe mesazh të qartë edhe të bashkësia ndërkombëtare se në këtë proces gjërat kanë devijuar dhe nuk është duke shkuar në proces të drejtësisë, por Gjykata Speciale është duke u përdorur në funksioni të padrejtësisë dhe me qëllime të caktuar për devijuar këtë proces”, ka thënë Demaku në emisionin “InfoNata” në Tëvë1.
Ai duke komentuar deklaratën e bërë nga zëdhënësi i VV-së, Arlind Manxhuka se kjo protestë është e vonuar, ka thënë se një gjë e tillë është për keqardhje.
Demaku ka thënë se VV për 4 vite në pushtet me gjithë fuqinë në Kuvend nuk ka bërë asnjë veprim për mbrojtjen e vlerave të UÇK-së.
“Deklarata për të ardhur keq. Nuk kanë bërë asgjë në mbrojtje të vlerave të luftës dhe sot ju pengon edhe protesta”, ka thënë Demaku.
Zëdhënësi i VV-së, Arlind Manxhuka, përmes një postimi në Facebook, ka kritikuar opozitën dhe kohën kur po organizohet protesta.
“Protesta është dhjetë vjet e vonuar. Është dashur që në verën e vitit 2015 të kundërshtohet pushteti i atëhershëm”, ka shkruar ai.
Manxhuka ka theksuar se historia e Kosovës dhe e luftës çlirimtare nuk mund të ndryshohet, por po ashtu as historiku i themelimit të Gjykatës Speciale, duke e quajtur
këtë të fundit një gjykatë jotransparente dhe jashtë praktikave ndërkombëtare.
Mijëra qytetarë kanë marrë pjesë në protestën kundër Gjykatës Speciale të organizuar nga OVL-UÇK.
Aty u tha se Specialja ka devijuar nga misioni i saj.
