Një takim midis presidentit rus, Vladimir Putin dhe presidentit të SHBA-së, Donald Trump është rënë dakord, tha të enjten një zyrtar i Kremlinit, dhe ai mund të zhvillohet javën e ardhshme në një vend që është vendosur “në parim”.
“Me sugjerimin e palës amerikane, është rënë dakord në parim që të mbahet një takim dypalësh në nivelin më të lartë në ditët në vijim”, u tha gazetarëve këshilltari i Putinit për çështjet e jashtme, Yuri Ushakov.
Java e ardhshme është data e synuar për një samit, tha Ushakov, ndërsa vuri në dukje se ngjarje të tilla kërkojnë kohë për t’u organizuar dhe nuk ka datë të konfirmuar. Vendi i mundshëm do të njoftohet “pak më vonë”, tha ai.
Ai gjithashtu minimizoi mundësinë që presidenti i Ukrainës, Volodymyr Zelenskyy, t’i bashkohet takimit të samitit për të diskutuar përfundimin e pushtimit 3-vjeçar të Rusisë ndaj fqinjit të saj, të cilin Shtëpia e Bardhë tha se Trump është gati ta marrë në konsideratë, raporton AP.
“Ne propozojmë, para së gjithash, të përqendrohemi në përgatitjen e një takimi dypalësh me Trumpin dhe e konsiderojmë shumë të rëndësishme që ky takim të jetë i suksesshëm dhe produktiv”, tha Ushakov.
Një takim midis Putinit dhe Trumpit do të ishte i pari i tyre që kur presidenti republikan u rikthye në detyrë këtë vit.
