Kina ka paralajmëruar Izraelin kundër “veprimeve të rrezikshme” në lidhje me ofensivën e tij në Gaza, duke shprehur shqetësim për planet e Tel Avivit për të përshkallëzuar më tej fushatën ushtarake në enklavën palestineze.
Reagimi i Pekinit vjen pas raportimeve nga mediat izraelite se kryeministri izraelit, Benjamin Netanyahu, me mbështetjen e Shteteve të Bashkuara, ka vendosur të ndërmarrë një riokupim të plotë të Gazës, duke përqendruar operacionet në zona ku besohet se mbahen pengje izraelite.
Ne i bëjmë thirrje Izraelit që të ndalojë menjëherë veprime të tilla të rrezikshme. Ne i bëjmë thirrje të gjitha palëve që të arrijnë menjëherë një marrëveshje armëpushimi të detyrueshme dhe të qëndrueshme”, tha të martën i dërguari i Kinës në OKB, Geng Shuang, në takimin e Këshillit të Sigurimit të OKB-së në Nju Jork.
“Ne u bëjmë më tej thirrje vendeve me ndikim të konsiderueshëm mbi palët e përfshira që të veprojnë në një mënyrë të drejtë dhe të përgjegjshme dhe të ndërmarrin hapa konkretë për të ndihmuar në arritjen e një armëpushimi”, tha ai, sipas një transkripti zyrtar të fjalimit të tij.
Që prej 7 tetorit 2023, Izraeli ka vrarë mbi 61,000 palestinezë, rreth gjysma e të cilëve gra dhe fëmijë. Operacionet ushtarake kanë shkatërruar infrastrukturën e enklavës dhe e kanë zhytur popullsinë në një krizë humanitare të rëndë, me rrezik të afërt urie./teve1/
