Deputetja e Lëvizjes Vetëvendosje, Arjeta Fejza, në emisionin “Info Nata” në Tëvë1 ka komentuar vendimin e presidentes Vjosa Osmani për të tërhequr kërkesën nga Gjykata Kushtetuese lidhur me konstituimin e Kuvendit të Kosovës. Ajo e ka mbështetur këtë vendim, duke e lidhur me emrin e gjyqtarit Radomir Laban.
“Pikërisht në vitin 2018, VV-ja ka dërguar një letër te ish-kryeministri Hashim Thaçi që të mos rekrutohet gjyqtari serb Radomir Laban. Në atë letër përmenden edhe arrestimet, të cilat i kemi të listuara, lidhur me biografinë dhe veprimtarinë e tij. Por ajo kërkesë nuk është marrë parasysh dhe ai është rekrutuar”, ka deklaruar Fejza.
Deputetja shtoi se është tejet e rëndësishme që persona me të kaluar të tillë të mos përfshihen në vendimmarrje për çështje kushtetuese.
“Ne e konsiderojmë si me vend atë që ka bërë Presidentja e vendit, pasi që një person, edhe sipas institucioneve tona të sigurisë, siç e përmendi edhe Presidentja në konferencë, i cili ka cenuar rendin kushtetues, nuk mund të jetë një faktor i rëndësishëm i cili do të marrë një vendim dhe do të vendosë një precedent tepër të rëndësishëm për rendin kushtetues të Republikës së Kosovës”, tha ajo.
Fejza ritheksoi qëndrimin e VV-së kundër emërimit të tij si gjyqtar raportues në këtë çështje dhe vlerësoi reagimin e Presidencës.
“Është tepër e rëndësishme që një person i tillë të mos jetë në rendin kushtetues të Republikës së Kosovës”, përfundoi ajo.
