Më shumë se një duzinë demokratësh nga Dhoma e Përfaqësuesve kanë nënshkruar një letër drejtuar administratës Trump, duke i kërkuar që të njohë një shtet palestinez.
Të paktën një nga demokratët nënshkrues planifikon të paraqesë një rezolutë pro-shtetësisë, raportoi Axios të hënën.
Letra u prezantua javën e kaluar nga përfaqësuesi Ro Khanna (D-Kaliforni). Deri tani, ajo ka mbledhur gjithsej trembëdhjetë nënshkrime, përfshirë përfaqësuesin André Carson (D-Ind.), një nga tre anëtarët myslimanë-amerikanë të Kongresit.
“Ky moment tragjik i ka nxjerrë në pah botës nevojën e shumëpritur për të njohur vetëvendosjen palestineze”, thuhet në letrën drejtuar Trump nga demokratët e Dhomës së Përfaqësuesve, sipas një kopjeje të siguruar nga Axios.
Prezantimi i letrës vjen në një kohë me raportime të shtuara për uri dhe mungesë ushqimi në Gaza, situata që ka vendosur shumë politikanë në një pozitë të vështirë, si dhe mes presionit ndërkombëtar gjithnjë në rritje ndaj SHBA-ve për të njohur një shtet palestinez.
Khanna theksoi se afërsisht 150 vende e kanë njohur tashmë një shtet palestinez dhe se SHBA-të nuk duhet të mbeten “të izoluara nga pjesa tjetër e botës së lirë”.
Ai shtoi se njohja nga SHBA-të do të përkrahej nga Lidhja Arabe, e cila javën e kaluar miratoi një plan që bën thirrje për krijimin e një shteti palestinez.
Pas njoftimit të Francës, Kanadaja, Malta dhe Mbretëria e Bashkuar kanë bërë të ditur se edhe ato do ta njohin shtetin palestinez në shtator.
Ndërkohë, Gjermania ka shprehur qëllimin e saj për ta njohur shtetin palestinez “në fund të negociatave për një zgjidhje me dy shtete”, sipas Reuters.
