Nga data 1 gusht 2025, Komuna e Istogut ka filluar zbatimin e një mase të re mbështetëse për nënat lehona, si pjesë e përkushtimit institucional për fuqizimin e familjes dhe mbështetjen e jetës së re. Iniciativa është ndërmarrë nga kryetari i komunës, Ilir Ferati, i cili ka bërë të ditur se çdo nënë që lind pas kësaj date do të përfitojë 150 euro ndihmë financiare.
“Jeta fillon me Nënën, ndërsa ne e vazhdojmë me mbështetje!”, ka shkruar Ferati në njoftimin e tij publik, duke e cilësuar këtë hap si një shenjë mirënjohjeje për dashurinë dhe gëzimin që nënat sjellin në komunitet.
Sipas njoftimit të Komunës së Istogut, mbështetja financiare do t’u ofrohet të gjitha nënave lehona që lindin pas 1 gushtit, në përputhje me kriteret dhe procedurat që do të shpallen nga zyrat komunale përkatëse.
“Për familjen. Për jetën. Për të ardhmen.” – përfundon postimi i kryetarit Ferati, duke theksuar se kjo masë synon të investojë në të ardhmen e qytetit dhe të shoqërisë në përgjithësi.
