Kanadaja do të njohë shtetin palestinez në shtator, njoftoi të mërkurën kryeministri Mark Carney, i fundit në një seri njoftimesh simbolike që janë pjesë e një ndryshimi më të gjerë global kundër politikave të Izraelit në Gaza.
Carney thirri një mbledhje të kabinetit për të diskutuar situatën në territorin e goditur palestinez. Ai tha se kjo ndodhi pasi diskutoi krizën me kryeministrin britanik Keir Starmer, i cili njoftoi një veprim të ngjashëm të martën, ka raportuar AP.
Udhëheqësit janë nën presion në rritje për këtë çështje, pasi skenat e urisë në Gaza kanë tmerruar kaq shumë njerëz në të gjithë botën. “Niveli i vuajtjeve njerëzore në Gaza është i patolerueshëm”, tha Carney.
“Kanadaja synon ta njohë Shtetin e Palestinës në Sesionin e 80-të të Asamblesë së Përgjithshme të Kombeve të Bashkuara në shtator 2025”, tha Carney – një veprim që ai tha se bazohej në “mbajtjen e zgjedhjeve të përgjithshme në vitin 2026 nga Autoriteti Palestinez, në të cilat Hamasi nuk mund të luajë asnjë rol, dhe në demilitarizimin e shtetit palestinez”.
Presioni për të njohur zyrtarisht shtetësinë palestineze është rritur që kur Presidenti francez Emmanuel Macron njoftoi javën e kaluar se vendi i tij do të bëhet fuqia e parë e madhe perëndimore që njeh një shtet palestinez në shtator. Carney tha se foli me Marcon të mërkurën.
