Deputetja e Lidhjes Demokratike të Kosovës, Hykmete Bajrami vlerëson se nëse Zyra e Rregullatorit për Energji, nuk e pezullon sot vendimin për përjashtimin e bizneseve nga shërbimi universal i furnizimit me energji, ajo do të hyjë në histori si armiku më i madh i ekonomisë në vend’.
Përmes një postimi në Facebook, Bajrami ka theksuar se janë në rrezik mbi 140 mijë vende pune dhe se përjashtimi i bizneseve nga tregu i rregulluar mund të shkaktojë valë të re të inflacionit për secilin produkt.
“E kemi thënë që në fillimi: nuk ka treg të lirë, bizneset nuk janë të përgatitura, as institucionet, andaj bizneset e përjashtuara nga tregu i rregulluar ende nuk i kanë faturat e muajit qershor”, ka shkruar ajo.
Tutje, ajo ka shtuar se Prokuroria nuk duhet të ketë pardon për bordin e ZRRE-së, pasi sipas saj, ZRrE-ja po e sakrifikon ekonominë, prodhimin vendor, si dhe 140 mijë vende pune ‘për interesa mafioze’.
“Nuk duhet të lejohet asnjëherë që njerëz që paguhen me para publike me punu për interesa private. Le të tregojë ZRRE-ja si institucion mbikëqyrës: Pse bizneset e përjashtuara nga tregu i rregulluar ende nuk i kanë faturat e muajit qershor? Pse importi i energjisë në qershor është rritur 800% krahasuar me muajin maj? Kush janë përfituesit e kësaj skeme? Emrat tashmë dihen: EFT-ja e Vuk Hamoviqit, tregtarët tjerë me nga dy punëtorë, e tash e tutje në rrethin e përfituesëve pritet me hy edhe kompanitë e licensuara së voni nga ZRrE-ja që kanë lidhje të ngushta me politikën. Prokuroria, o sot, o kurrë”, ka përfunduar Bajrami.
