Publicisti, Kim Mehmeti, në emisionin “Këndi i Debatit” në Tëvë1, ka vlerësuar se në Kosovë duhet të ketë patjetër zgjedhje të reja parlamentare.
Sipas Mehmetit, të 120 deputetët e legjislaturës së nëntë janë treguar të papërgjegjshëm me moskonstituimin e Kuvendit të Kosovës.
“Mendoj se me zgjedhjet e ardhshme, se këtu medoemos duhet të ketë zgjedhje. Këtu 120 deputetët u treguan të papërgjegjshëm e tani populli duhet të tregojë sesi e vlerëson atë papërgjegjësi të atyre. As në këto zgjedhje unë mendoj edhe besoj se ky popull nuk do të gaboj dhe nuk gabon me të vërtetë se deri më tani nuk ka gabuar. Populli do ta shoh se këta qëllim të vetëm e kanë vetëm qeverinë edhe e kanë ndonjëherë atë qëllim për një arsye të thjesht se i frikësohen të shkuarës së vet..”, ka thënë në emisionin “Këndi I Debatit” në Tëvë1.
Megjithatë, Mehmeti nuk beson se Lëvizja Vetëvendosje do të ketë rënie në zgjedhjet e reja potenciale.
“Unë nuk besoj se Vetëvendosje do të ketë rënie. Pushteti i konsumon të gjithë. Në pushtet mund të jeni edhe evlia si kryeministër por të gjithë ata përreth jush nuk mund t’i kontrolloni edhe pushteti është i parezistueshëm edhe pushteti i prish njerëzit, prandaj edhe në botë ato ndërrohen”, ka theksuar Mehmeti.
