Kryeministri britanik Keir Starmer i ka thënë kabinetit të tij se Mbretëria e Bashkuar do ta njohë shtetin e Palestinës deri në shtator, nëse Izraeli nuk ndërmerr “hapa thelbësorë” për t’i dhënë fund luftës në Gaza dhe nuk angazhohet për një proces paqeje të qëndrueshëm.
Sipas një deklarate qeveritare të lëshuar pas një takimi urgjent të kabinetit të martën, Starmer tha se masa mund të paraqitet para Asamblesë së Përgjithshme të Kombeve të Bashkuara në Nju Jork, nëse Izraeli nuk pranon një armëpushim, nuk ndalon planet për të aneksuar pjesë të Bregut Perëndimor të pushtuar dhe nuk mbështet një rrugë politike drejt një zgjidhjeje me dy shtete.
Ndaj kësaj kanë reaguar, Partia Kombëtare Skoceze (SNP) dhe të Gjelbrit Skocezë të cilët kanë bërë thirrje për njohje të pakthyeshme dhe të pakushtëzuar të shtetësisë palestineze, e cila duhet të mbështetet edhe nga sanksione kundër Izraelit nëse dhuna vazhdon, ka shkruar Anadolu.
Partitë politike skoceze kanë paralajmëruar se njohja e Palestinës duhet të jetë “e pakthyeshme” dhe pa “leva” në përgjigje të njoftimit të kryeministrit të Mbretërisë së Bashkuar, Keir Starmer të martën se Britania do të mbështesë shtetësinë palestineze në shtator nëse Izraeli nuk përmbush kushte të caktuara.
Javën e kaluar, Presidenti francez Emmanuel Macron konfirmoi se Franca do ta njihte zyrtarisht shtetin palestinez gjatë Asamblesë së Përgjithshme të OKB-së në shtator.
Deri më tani, 149 nga 193 shtetet anëtare të OKB-së e kanë njohur Palestinën – një numër që është rritur vazhdimisht që kur Izraeli filloi luftën e tij në Gaza në tetor 2023.
Njoftimi i Starmer erdhi mes presionit në rritje mbi qeverinë britanike, pasi më shumë se 250 ligjvënës nënshkruan një letër që kërkonte që qeveria të njihte shtetësinë palestineze./teve1/
