Pamundësia për të ecur përpara e ka dëmtuar besueshmërinë e Kosovës, tha ish-kryeministri suedez, Carl Bildt derisa ka komentuar vonesën e formimit të institucioneve të reja.
“A do të ketë ndonjëherë Kosova një qeveri të re? Pamundësia për të ecur përpara dëmtoi besueshmërinë e vendit. Dhe kjo është keq për të gjithë”, ka shkruar ai në X.
Kosova është futur në krizë politike si pasojë e mungesës së formimit të institucioneve të reja.
Vendi ka mbajtur zgjedhjet e përgjithshme më 9 shkurt por ka ngecur te konstituimi i Kuvendit.
Lëvizja Vetëvendosje – partia që ka fituar më së shumti vota në zgjedhje, e ka propozuar Albulena Haxhiun për kryetare të Kuvendit por e njëjta gjashtë herë me radhë nuk ka arritur t’i marrë 61 votat e nevojshme në votim të hapur.
Partitë që deri më tash ishin në opozitë e kundërshtojnë emrin e Haxhiut për këtë pozitë, duke e konsideruar figurë të papranueshme.
Të hënën, më 21 korrik, është bërë tentimi i 50-të për konstituimin e Kuvendit ndërkohë që po afrohet përfundimi i afatit të Gjykatës Kushtetuese e cila ka urdhëruar që legjislatura e nëntë të formohet deri më 26 korrik.
Megjithatë, Kushtetuesja nuk ka treguar nëse do të ketë pasoja nëse një gjë e tillë nuk ndodh.
