Pas përfundimit të seancës dëgjimore për caktimin e masës së sigurisë ndaj zyrtarit policor Bojan Jevtiq, i dyshuar për veprën penale të spiunazhit, avokati i tij, Milosh Nikolliq, deklaroi se ka kërkuar që klienti të mbrohet në liri, duke ofruar garanci prej 15 mijë eurosh për të shmangur masën e paraburgimit.
“Jevtiqi është pjesëtar i Policisë së Kosovës që nga viti 2002. Ne kemi paraqitur argumente në favor të tij, duke garantuar se ai do të jetë i qasshëm për organet e drejtësisë gjatë gjithë procedurës dhe do të përgjigjet çdo thirrjeje,” tha Nikolliq për mediat pas seancës.
Ai shtoi se mbrojtja e konsideron më të përshtatshme masën e arrestit shtëpiak me mbikëqyrje policore, pasi procedura është në fillim dhe mund të zgjasë gjatë.
“Mendojmë se nuk ka nevojë për paraburgim të menjëhershëm,” theksoi ai.
Avokati sqaroi se Jevtiqi nuk ka mbajtur pozita të larta në hierarkinë policore dhe ka shërbyer në pikën kufitare te ‘Dheu i Bardhë’, në detyra të zakonshme operative.
Për sa i përket provave të sekuestruara, Nikolliq tha se mbrojtja nuk ka ende qasje në to, për shkak se procedura është në fazën hetimore dhe se dokumentacioni nuk u është dorëzuar nga Prokuroria Speciale.
“Nuk kemi informata të plota mbi provat që ka prokuroria. Pasi t’i pranojmë zyrtarisht, do të kemi mundësi të japim komente konkrete,” deklaroi ai.
Ndërkohë, Lubisha Jevtiq, vëllai i të dyshuarit, tha për gazetarët se ndalimi i Bojan Jevtiqit është pa bazë ligjore.
“Ai është njeri i ndershëm, punon prej 23 vitesh në Policinë e Kosovës, është baba i tre fëmijëve dhe nuk ka pasur kurrë asnjë problem me ligjin. Jam i bindur se do të lirohet dhe nuk do të ketë fare proces gjyqësor,” tha ai.
Vendimi për kërkesën e Prokurorisë Speciale për paraburgim prej 30 ditësh pritet të merret brenda ditës.
