Mbi 150 shtetas të Shqipërisë kanë nisur tashmë procedurat për përfitimin e pensioneve në kuadër të marrëveshjes për njohjen e ndërsjellë të sigurimeve shoqërore mes Shqipërisë dhe Italisë, e cila hyri në fuqi më 1 korrik.
Ky lajm u bë i ditur pas takimit të ministrit të Ekonomisë, Kulturës dhe Inovacionit, Blendi Gonxhja, me drejtoreshën e Institutit Kombëtar të Sigurimeve Shoqërore në Itali, Valeria Vittimberga.
Marrëveshja u jep mundësi qytetarëve shqiptarë të bashkojnë periudhat e punës dhe kontributeve në të dyja shtetet, duke siguruar kështu të drejtën për pension, edhe nëse nuk plotësojnë minimumin prej 15 vitesh sigurim në Shqipëri.
“Kërkesat e para janë kryesisht për bashkimin e periudhave të sigurimit për qëllime pensioni në Itali, si dhe nga individë që nuk plotësojnë minimumin prej 15 vitesh sigurim në Shqipëri,” deklaroi ministri Gonxhja.
Instituti i Sigurimeve Shoqërore në Shqipëri ka ngritur të gjithë infrastrukturën e nevojshme për të menaxhuar kërkesat. Shkëmbimi i formularëve mes institucioneve të dy vendeve do të bëhet në mënyrë elektronike, duke shkurtuar ndjeshëm kohën e pritjes dhe duke lehtësuar shërbimin për qytetarët.
Për të ofruar transparencë dhe udhëzim të saktë, janë publikuar tashmë të gjitha manualet dhe udhëzimet me hapat që duhen ndjekur për çdo kategori aplikanti, transmeton RTSH.
Marrëveshja me Italinë shihet si një model i rëndësishëm bashkëpunimi, që pritet të zgjerohet edhe me vende të tjera ku jetojnë dhe kontribuojnë shqiptarët.
