Prokuroria Themelore në Prizren ka ngritur aktakuzë kundër të pandehurit E.K., i cili ndodhet në paraburgim që nga data 13 mars 2025, nën dyshimet për kryerjen e veprës penale “Fajdeja”.
Sipas aktakuzës, E.K. dyshohet se nga korriku i vitit 2023 e në vazhdimësi, ka përfituar shuma jo-proporcionale të pasurisë në këmbim të shërbimeve të dhëna ndaj një personi tjetër, duke shfrytëzuar gjendjen e tij të rëndë financiare dhe pamundësinë për të gjykuar në mënyrë të drejtë.
Fillimisht, E.K. i kishte dhënë viktimës V.Q. shumën prej 5 mijë euro, me 15% kamatë, duke e detyruar ta kthente 6 mijë euro. Më pas, viktima kishte marrë edhe dy herë nga 10 mijë euro me 20% kamatë, dhe në total kishte kthyer 24 mijë euro.
Në një rast tjetër, V.Q. kishte marrë 25 mijë euro të tjera dhe për shkak të vonesave në pagesë ishte detyruar të kthente 40 mijë euro, përfshirë kamatat mujore prej 6 mijë euro, duke çuar vlerën totale në rreth 51 mijë euro.
Përveç parave, viktima ishte detyruar të merrte edhe një veturë nga i pandehuri me çmim 38 mijë euro, me këstin e parë prej 8 mijë euro. Megjithatë, pas kësaj pagese, E.K. ia kishte marrë dhunshëm veturën, duke e detyruar të paguante edhe 6 mijë euro shtesë.
Për shkak të borxheve në rritje, viktima kishte detyruar të shesë dy banesa për të mbuluar humbjet, që sipas Prokurorisë shkojnë mbi 100 mijë euro, prej të cilave 48 mijë vetëm nga fajdeja.
Policia ka sekuestruar në kuadër të këtij rasti:
8,985 euro
580 franga zvicerane
1,000 dollarë amerikanë
17,700 lekë shqiptare
Një veturë
Sipas Prokurorisë, ekziston dyshim i bazuar se këto janë dobi pasurore të fituara përmes veprës penale.
