Para fillimit të përpjekjes së 48-të për konstituim të Kuvendit të Kosovës, veterani i Ushtrisë Çlirimtare të Kosovës (UÇK), Lulzim Prokshi në shenjë revolte për mos konstituimin e Kuvendit nga sot ka nisur protestë dhe grevë urie.
Prokshi i cili ka ardhur nga Kroacia, ka ftuar edhe veteranë të tjerë të luftës çlirimtare, si dhe gjithë popullin e Kosovës që t’i bashkohen protestës së tij.
“Kam dalë për zhagitjen që po e bëjnë për konsituimin e kuvendit që të konstituohet kuvendi. Unë kam shprehur dhe jam, do të bëjë grevë urie derisa këta të vendosin. I ftojë të gjithë veteranët, gjithë edhe popullatën kush të do me ardhur, sot është momenti i fundit, boll më. Populli nuk duron. Sa muaj shkuan, s’ka kuvend. Nga kuvendi nisin të gjitha institucionet, nga këtu bëhet edhe shteti. Ne shtetin jemi duke e shkatërruar, nuk jemi duke e zhvilluar”, u shpreh ai.
