Një ish-minator nga Mitrovica ka protestuar sot para Kuvendit të Kosovës, duke kërkuar nga deputetët formimin e menjëhershëm të Parlamentit të ri. Ai foli në emër të ish-minatorëve të “Trepçës” dhe theksoi se qytetarët i kanë dhënë votat përfaqësuesve politikë dhe nuk duhet që ato të keqpërdoren.
“Na keni premtuar dhe na keni borxh. Nuk kemi luftuar që sot të mashtrohemi. Familjet e minatorëve jetojnë në kushte të vështira, ndërsa ne ende kërkojmë drejtësi,” tha protestuesi, duke shtuar se zvarritja e formimit të institucioneve po i shkon për shtati Serbisë.
Ai përmendi edhe ngjarjet historike të protestës së minatorëve të “Trepçës” më 1988, duke kujtuar vendimin për t’u nisur në këmbë për në Prishtinë për të kërkuar të drejtat e tyre dhe vuajtjet e përjetuara gjatë rrugës.
“Prej 1260 minatorëve, sot janë gjallë vetëm 217. Vullneti jonë është të tregojmë të vërtetën për çfarë kemi luftuar,” u shpreh ai.
Protestuesi i bëri thirrje udhëheqësve politikë të veprojnë me përgjegjësi kombëtare dhe të mos lejojnë që vonesat në formimin e institucioneve të kënaqin Serbinë.
“Kërkesa jonë është që sa më shpejt të formohet parlamenti dhe të ecim përpara. Mjaft na kanë masakruar dhe po i kënaqim ata që na kanë dëmtuar. Jemi shqiptarë dhe duam drejtësi për familjet tona,” përfundoi ai.
