Sot, me fillim nga ora 11:00, pritet të mbahet seanca e 48-të e Kuvendit të Kosovës, me qëllim të konstituimit të legjislaturës së nëntë.
Kanë kaluar plot tre muaj që nga hapja e seancës konstituive, por ngërçi politik ende nuk ka marrë zgjidhje. As në përpjekjen e 47-të, të martën e kaluar, deputetët nuk arritën të konstituojnë Kuvendin.
Ngjashëm me përpjekjet e kaluara, edhe këtë herë përfaqësuesit e dy blloqeve politike kanë vazhduar akuzat e ndërsjella për bllokim dhe dështim në gjetjen e një marrëveshjeje për ndarjen e pozicioneve udhëheqëse në Kuvend.
Derisa pritjet janë që edhe seanca e sotme mund të përfundojë pa sukses, qytetarët dhe analistët politikë vazhdojnë të shprehin shqetësimin për vonesat dhe mungesën e funksionalitetit institucional.
