Një 26-vjeçar është arrestuar sot në Mitrovicë nga Policia e Kosovës, pasi u kap në posedim të një arme zjarri pa leje.
Sipas njoftimit zyrtar, rreth orës 16:00, njësitë e Stacionit Policor Mitrovicë Jugu kanë ndaluar një automjet gjatë patrullimit në rrugën “Migjeni”. Gjatë kontrollit të mjetit, poshtë ulëses së pasagjerit është gjetur një armë e tipit pistoletë, për të cilën personi i ndaluar nuk posedonte leje.
I dyshuari, M.I., 26-vjeçar, shtetas i Republikës së Kosovës, është arrestuar dhe shoqëruar në stacionin policor për procedura të mëtejshme. Policia ka konfiskuar armën, një karikator dhe 28 fishekë, të cilat do të shërbejnë si prova materiale në procesin hetimor.
Rasti është cilësuar si “Mbajtje në pronësi, kontroll ose posedim të paautorizuar të armës”, ndërsa me vendim të prokurorit të shtetit, të dyshuarit i është caktuar masa e ndalimit për 48 orë. Hetimet lidhur me rastin janë duke vazhduar.
Postimi i plotë:
