Presidentja e Kosovës, Vjosa Osmani, ka akuzuar Serbinë për përpjekje të vazhdueshme për destabilizim të Kosovës.
Osmani në një konferencë për media me presidentin e Letonisë Edgars Rinkeviç, ka thënë se Kosova kurrë nuk ka sulmuar shtetet fqinjë, por se do ta mbrojnë integritetin dhe pavarësinë e vendit.
“Ne nuk duhet ta fusim kurrë agresorin dhe viktimën në të njëjtin thes. Serbia përpiqet vazhdimisht ta destabilizojë vendin tonë, përfshirë përmes akteve të agresionit, ndërsa ne mbrohemi vazhdimisht. Ne kurrë nuk kemi pushtuar ose sulmuar, madje as edhe një centimetër të territorit të ndonjë fqinji. Ajo çfarë kemi bërë gjithmonë dhe do të vazhdojmë ta bëjmë, është ta mbrojmë pavarësinë tonë, ta mbrojmë integritetin tonë territorial, ta mbrojmë paqen dhe lirinë, që janë fituar me shumë sakrificë”, tha presidentja e Kosovës.
Ditë më parë gjatë vizitës në ShBA, Osmani ka thënë se presidenti amerikan, Donald Trump, ka parandaluar së voni mundësinë e një përshkallëzimi të mundshëm të situatës nga Serbia në Kosovë.
Deklarata e saj nxiti reagime edhe në Kosovë. Osmanit i ka reaguar edhe ish-i dërguar special i ShBA-së për Ballkanin Perëndimor, Richard Grenell, duke akuzuar presidenten për manipulim të deklaratave të Trump.
Ndërsa, Osmani ka paralajmëruar mbajtën e një konference për të sqaruar deklaratën e dhënë.
