Deputetja e VV-së, Albulena Haxhiu, pak para nisjes së seancës së 47-të të konstituimit të Kuvendit ka deklaruar se as sot s’do të ketë ndryshim të situatës politike.
Pasi sipas saj, ish-partitë opozitare nuk kanë ndryshuar qëndrim.
“Ato nuk është që kanë ndryshuar qëndrim, nuk kanë thënë se sot do të vijnë dhe do të votojnë, sipas përgjegjësive Kushtetuese të tyre që i kanë dhe sipas dy aktgjykimeve të Kushtetueses. Prandaj, nuk besoj që do të ketë ndryshim të situatës fatkeqësisht. Por, ne tashmë kemi një afat të përcaktuar nga Gjykata Kushtetuese që është 26 korriku dhe shpresojmë që deri atëherë do të ketë reflektim dhe të gjithë deputetët ta kryejnë detyrën e tyre kushtetuese”, deklaroi ajo para gazetarëve.
Haxhiu tha se VV-ja ka vullnet politik për të bashkëpunuar me NISMA-n, ku edhe bëri të ditur që kryeministri në detyrë, Albin Kurti do të takohet me kryetarin e këtij subjekti, Fatmir Limajn.
“Natyrisht që do të ketë takime me Limajn. Kurti do të ketë takime me Limajn, tashmë e kemi bërë të qartë që kemi vullnet të dyja palët që të vazhdojmë bashkëpunimin, por që nuk ka asgjë ende konkrete”, tha ajo./teve1.info/
