Presidenca e Kosovës ka bërë publike një përmbledhje të vizitës zyrtare të Presidentes Vjosa Osmani në Shtetet e Bashkuara të Amerikës, duke nënvizuar takimet dhe angazhimet që, sipas njoftimit, kishin për qëllim thellimin e partneritetit strategjik me ShBA-në.
Në fokus të kësaj vizite kanë qenë takimet me zyrtarë të lartë amerikanë dhe përfaqësues të Kongresit, përfshirë:
Zv. Sekretarin amerikan të Shtetit, Christopher Landau
Ndihmës Sekretarin në detyrë për Çështje Evropiane dhe Euroaziatike, Brendan Hanrahan
Ambasadore Dorothy Shea, përfaqësuese në Misionin e SHBA-së në OKB
Senatorin Andy Kim
Kongresistin Ritchie Torres
Sipas njoftimit, në takimin me Landau, është diskutuar ndërtimi i kapitujve të rinj të bashkëpunimit strategjik, në përputhje me vizionin e Administratës Trump, me theks në siguri, zhvillim dhe investime.
Përveç takimeve zyrtare, Osmani ka marrë pjesë në tryeza diskutimi në disa nga institutet dhe universitetet më të njohura amerikane:
Në Hudson Institute në Washington D.C., ajo mbajti fjalimin kryesor për lidershipin amerikan në Evropë dhe Ballkanin Perëndimor.
Në Johns Hopkins University, diskutoi për roli i Kosovës në arkitekturën globale të sigurisë dhe aleancën transatlantike.
Në Atlantic Council, mori pjesë në një tryezë të rrumbullakët ku foli për zhvillimet në Kosovë dhe rëndësinë e anëtarësimit në NATO.
Gjatë qëndrimit në New York, Presidentja Osmani dekoroi me medalje presidenciale disa pjesëtarë të diasporës shqiptaro-amerikane për kontributin e tyre në lirinë dhe pavarësinë e Kosovës.
Po ashtu, me ftesë të Presidentit të FIFA-s, Gianni Infantino, Osmani mori pjesë në një darkë zyrtare për Kupën e Botës për Klube, ku takoi personalitete nga bota e sportit dhe politikës globale.
“Kosova qëndron krah për krah me Shtetet e Bashkuara – në vlera, në vizion dhe në veprim,” thuhet në fund të njoftimit zyrtar nga Presidenca.
