Pas dështimit të 45-të radhazi për konstituimin e Kuvendit të Kosovës, kryetari i Nismës Socialdemokrate, Fatmir Limaj, ka bërë të ditur se përpjekjet për të zhbllokuar situatën politike do të vazhdojnë.
Ai tha se partitë tashmë kanë bërë disa lëshime nga qëndrimet e tyre fillestare dhe se ekziston gatishmëri për dialog.
Limaj paralajmëroi gjithashtu një takim të mundshëm me kryeministrin në detyrë, Albin Kurti, javën e ardhshme.
“Kryeministri është në Bosnjë, por kur të kthehet kam ndërmend ta ftoj për një kafe, si përpjekje për të gjetur zgjidhje,” deklaroi ai
Limaj poashtu tutje tha se ngërçi institucional duhet të tejkalohet duke vënë interesin e shtetit mbi gjithçka.
“E njëjta situatë. Ky ngërç duhet të tejkalohet duke e vendosur në epiqendër shtetin. Shumë njerëz mendojnë se ekzistenca e shtetit është e mirëqenë, por shteti duhet merituar dhe mirëmbajtur çdo ditë për ta pasur”, u shpreh Limaj.
Ai paralajmëroi se mungesa e përgjegjësisë po e dëmton seriozisht funksionimin e shtetit dhe e krahasoi situatën me shembuj nga bota ku shtetet janë shpërbërë për shkak të mungesës së përgjegjësisë institucionale.
“Bota ka njohur shumë shtete që nuk ekzistojnë më. Ata e kanë humbur shtetin sepse nuk e kanë merituar. Kam përshtypjen që mungesa e përgjegjësisë po shkon në ato nivele dhe shtetin po e shohin si diçka që gjithmonë dikush tjetër do ta ruajë,” shtoi ai.
Limaj kërkoi reflektim të menjëhershëm nga të gjitha partitë për të zgjidhur krizën dhe për ta kthyer normalitetin institucional në vend.
