Ka disa vite që nuk kanë ujë të pijshëm.
E për këtë hall që kanë, banorët e Mahallës së Boshnjakëve në Batllavë po kërkojnë një zgjidhje.
Atë e shprehën përmes një proteste që mbajtën këtë të enjte.
Përfaqësuesi i kësaj lagje, Nexhmi Hyseni tha se gypi kryesor që mund ta kryej furnizimin me ujë për pesë komuna, kalon në arën e tij.
Ai paralajmëroi se nëse nuk ndërmerren masa, do ta dëmtojë atë.
“Ky grunë momentin që hiqet, kanë me ardhë bagerat këtu e kanë me shpue, se këtu kalon gypi kryesor që i furnizon pesë komunat e Kosovës. E pesë komuna me u furnizu e unë mos me pas zgjidhje për fëmijët e mi, unë qaj i pari që kur të hiqet gruni, kom me pru bagerin, se ja kom dhonë betimin dhe jom zotu para qetyne njerëzve, se jam kanë në Këshill”, tha përfaqësuesi i lagjes, Nexhmi Hyseni.
E sipas banorit tjetër, Haki Hyseni, pa ujë të pijshëm janë që 20 vjet.
“Qe 20 vjet ujë të pijshëm s’kemi në lagjën tonë. Unë zgjidhjen për ujë për me vaditë e kom bo, bunarin 77 metra e kom. Ujë kom sa dush, po ky ujë nuk është as me vaditë, le mo me pi. Është veç për nevojat personale në oborr, plus asaj i ka tha krejt”, deklaroi ai.
Por punimet rreth këtij problemi, sipas zëdhënësit të komunës së Podujevës, pritet të nisin gjatë muajit shtator.
“Komuna e Podujevës, në bashkëpunim me kompaninë rajonale të ujësjellësit në Prishtinë, ka ndërmarrë hapa në këtë drejtim. Sivjet po planifikohen që për atë lagje i ka nda diku 60 mijë euro, por edhe Komuna e Podujevës do të participojë në shtrirjen e rrjetit të ujësjellësit, dhe këta banorë më pas do të kenë ujë të pijshëm”, tha Fatri Zhitia.
Një gjë të tillë e konfirmuan për televizionin edhe nga Kompania e Ujësjellësit Rajonal të Prishtinës.
“Buxheti prej 60 mijë euro është ndarë sot për vendosjen e një arterie të re vetëm për ata banorë që nuk kanë ujë aty. Kështu që zgjidhja bëhet këtë vit për ta”, deklaroi Arjeta Mjeku.
Nëse nuk u bëhet një zgjidhje, banorët paralajmëruan se do të ndërmarrin edhe organizime të tjera.
Kronikë e realizuar nga gazetarja – Adea Mustafaj
