Gjykata Themelore në Prishtinë ka aprovuar kërkesën e Prokurorisë për caktimin e masës së paraburgimit ndaj pesë zyrtarëve policorë të dyshuar për “vrasje nga pakujdesia” në rastin e vdekjes së 27-vjeçarit Agon Zejnullahu nga Lipjani.
Lajmin e ka konfirmuar për Tëvë1 zëdhënësja e Gjykatës Themelore në Prishtinë, Mirlinda Gashi.
Paraprakisht, ishte mbajtur seanca dëgjimore ndaj të dyshuarve – një rreshter dhe katër zyrtarë të tjerë policorë – të cilët janë paraqitur mëngjesin e së martës në Degën e Gjykatës në Lipjan.
Agon Zejnullahu ndërroi jetë në orët e para të së hënës në rrugën “Haradin Bajrami” në Lipjan, ndërsa ishte i prangosur. Sipas deklaratave të Policisë së Kosovës, zyrtarët kishin ndërhyrë për ta neutralizuar Zejnullahun, pasi dyshohej se ishte nën ndikimin e alkoolit dhe po sulmonte automjete dhe kalimtarë të rastit.
Pas vdekjes së tij, Inspektorati Policor i Kosovës arrestoi pesë zyrtarët policorë të përfshirë në rast, ndërsa prokuroria e ka cilësuar veprën si “vrasje nga pakujdesia”.
Hetimet për zbardhjen e plotë të rastit janë në zhvillim e sipër.
