Avokati i Popullit, Naim Qelaj, ka reaguar lidhur me rastin e vdekjes së 27-vjeçarit, Agon Zejnullahu, ku të përshirë janë pesë zyrtarë policorë.
Qelaj e ka cilësuar rastin kompleks dhe me pasoja fatale, duke ngritur shqetësime serioze për mungesën e reagimit në kohë të institucioneve shtetërore.
“Rasti është shumë kompleks, me pasoja fatale për familjen e të ndjerit gjë që bën që institucionet e Kosovës në vazhdimësi po reagojnë vetëm kur po ndodhin pasojat dhe sa duket nuk po reflektojnë në nevojat e ndërmarrje së masave që bëjnë që rastet e tilla mos të përsëriten. Natyrshëm pamjet e transmetuara nga mediat kanë treguar një shpërfaqje të një brutaliteti dhe trajtim jo-njerëzor në aspektin e shumë veprimeve që janë ndërmarrë aty. Është e rëndësishme me i pritë rezultatet e ekzaminimeve dhe qëndrimet zyrtare të institucioneve kompetente për këto çështje”, ka deklaruar ai në emisionin “Mesditë” në Tëvë1.
Avokati i Popullit ka theksuar nevojën që ky rast të shërbejë si sinjal alarmi për institucionet, duke kërkuar masa preventive për të parandaluar përsëritjen e situatave të tilla në të ardhmen.
“Ky rast duhet me pas ndikim në punën e institucioneve që të marrin masa preventive dhe raste të tilla mos me ndodhë. Për me garantua që procesi i hetimit në këtë rast do të jetë i plotë dhe do të jetë profesion ne kemi hapur rast për hetim. Do ta hetojmë me shumë kujdes”, deklaroi Qelaj.
Institucionet relevante ende nuk kanë dalë me qëndrim zyrtar përfundimtar për rastin, ndërsa hetimet janë në zhvillim.
Ndërkohë, tashmë janë bërë dy orë prej kur ka filluar seanca gjyqësore ndaj pesë zyrtarëve policorë, seancë kjo e mbyllur për media, madje prezentë nuk është as familja e viktimës e as avokati mbrojtës./teve1.info/
