Avokati Ardian Bajraktari ka komentuar zhvillimet lidhur me rastin e vdekjes së 27-vjeçarit në emisionin “Këndi i Debatit” në Tevë1, duke theksuar se janë së paku tri pista hetimore që duhet të merren parasysh nga institucionet.
“Sipas bindjes sime, janë tri mundësi që duhen shqyrtuar. Njëra prej tyre tashmë po trajtohet nga Prokuroria e Shtetit, për veprën penale ‘vrasje nga pakujdesia’, e cila parasheh dënim prej 6 muaj deri në 5 vjet burg,” deklaroi Bajraktari.
Ai shtoi se një mundësi tjetër është vdekja si rezultat i mbidozës së mundshme, që do të mund të vërtetohet ose përjashtohet nga raporti i Institutit të Mjekësisë Ligjore, i cili pritet të përfundohet brenda 15 ditëve, megjithëse për shkak të ndjeshmërisë së rastit, mund të përshpejtohet.
Avokati gjithashtu ngriti shqetësimin për përsëritjen e rasteve ku përfshihen zyrtarët policorë, duke kërkuar një analizë të thelluar institucionale mbi mënyrën se si trajnohen dhe përgatiten zyrtarët policorë.
“Nëse kemi të bëjmë me zyrtarë të rinj të Policisë, atëherë duhet rishikuar urgjentisht kualiteti i trajnimeve të tyre. Ka kaluar mbi 25 vite nga paslufta, dhe nëse trajnimet janë shkurtuar, kjo paraqet rrezik,” theksoi ai.
Bajraktari përfundoi duke theksuar nevojën për transparencë, profesionalizëm dhe përgjegjësi, ndërsa hetimet për rastin janë ende në zhvillim nga Prokuroria, IPK dhe Mjekësia Ligjore.
