Presidentja e Republikës së Kosovës, Vjosa Osmani, ka zhvilluar takim me kryetaren e Nova Demokratska Stranka, znj. Emilija Redžepi, në kuadër të raundit të konsultimeve me përfaqësues të partive politike, me synim kapërcimin e bllokadës aktuale në Kuvendin e Kosovës.
Takimi u fokusua në nevojën për gjetjen e një zgjidhjeje institucionale që do të mundësonte konstituimin e legjislaturës së re dhe vazhdimin e proceseve demokratike në vend.
Presidentja Osmani po ndërmjetëson takime të njëpasnjëshme me liderët e subjekteve politike, duke theksuar rëndësinë e bashkëpunimit institucional dhe respektimit të rendit kushtetues, me qëllim të garantimit të funksionimit demokratik të Kuvendit.
Ky takim shënon një tjetër hap në përpjekjet e Presidencës për të zhbllokuar situatën parlamentare, pas dështimeve të njëpasnjëshme për konstituimin e legjislaturës së nëntë.
