Para nisjes së seancës së 41-të konstituive të Kuvendit të Kosovës, ministri i Financave, Hekuran Murati, bëri thirrje që të gjitha palët politike të reflektojnë dhe të marrin seriozisht nevojën për konstituimin e Kuvendit dhe vazhdimin e qeverisjes.
Murati theksoi se, edhe pse qeveria në detyrë po funksionon, mungesa e Kuvendit të konstituar po pengon ratifikimin e marrëveshjeve ndërkombëtare dhe zhvillimin normal të punëve institucionale.
“Jemi përsëri me një seancë konstituive. Shpresoj që pas takimeve të djeshme mes opozitës dhe Presidentes, të jetë reflektuar seriozisht për situatën që Kuvendi duhet të konstituohet dhe qeverisja të vazhdojë. Ne kemi qeveri në detyrë, por nuk kemi Kuvend të konstituar, dhe kjo po ndikon në çështje të rëndësishme, si ratifikimi i marrëveshjeve ndërkombëtare që nuk u realizuan vitin e kaluar,” tha Murati.
Ai bëri thirrje që të gjithë partit politikë t’i japin mundësi votimit të fshehtë në seancë, për të dalë nga ngërçi dhe për të shmangur bllokadën e mëtejshme institucionale.
Seanca e 41-të për konstituimin e Kuvendit mbahet sot, në një përpjekje të re për të kaluar bllokadën që ka zgjatur muaj me radhë.
