Kryetari i Lidhjes Demokratike të Kosovës, Lumir Abdixhiku, ka reaguar pas takimit që zhvilloi sot me Presidenten e vendit, Vjosa Osmani, lidhur me krizën aktuale politike në vend.
Përmes një postimi, Abdixhiku ka bërë të ditur se gjatë takimit ka ndarë me Presidenten qëndrimet dhe bindjet e LDK-së në lidhje me zhvillimet politike, sidomos pas aktgjykimit të Gjykatës Kushtetuese.
“Presidenten e vendit, znj. Vjosa Osmanin, në takimin e sotëm konstruktiv, e njoftova mbi qëndrimet dhe bindjet e Lidhjes Demokratike të Kosovës mbi krizën e madhe politike në vend – para dhe pas aktgjykimit të Gjykatës Kushtetuese”, shkroi Abdixhiku.
Ai theksoi brengën e LDK-së për, siç i quajti, vonesat e paprecedenta procedurale dhe politike në formimin e shumicës së re parlamentare. Gjithashtu, kritikoi veprimet e partisë fituese në Kuvend, duke e akuzuar për pengim të votimit të lirë dhe për refuzim të zbatimit të aktgjykimit kushtetues.
“Insistimi në bllokadë me gjithë mundësitë për kompromis e arsyeshmëri, është insistim në krizë; gjersa mosrespektimi i Gjykatës Kushtetuese në një çështje kaq jetike për shtetin, është përmbysje e rendit kushtetues”, ka theksuar Abdixhiku.
Ai nënvizoi se LDK e respekton në tërësi vendimin e Gjykatës Kushtetuese dhe ka qenë gjithmonë në favor të unitetit politik.
Në fund, kreu i LDK-së tha se mirëpret çdo takim dhe përpjekje për zgjidhje, por theksoi se mbi të gjitha nevojitet përgjegjësi politike dhe arsyeshmëri për të dalë nga kriza.
