Tash e disa vjet, këta zyrtarë policorë që kujdesen për sigurinë në Zubin Potok, kanë qëndruar në kontejnerë këtu. Mirëpo kjo shumë shpejt do të ndryshojë.
Kjo pasi aty, këtë të martë, u vendos gurthemeli për ndërtimin e stacionit të ri.
Se me të do të shtohet edhe më shumë siguria, e tha ministri në detyrë i Punëve të Brendshme, Xhelal Sveçla.
“Sapo vumë gurthemelin për fillimin e punës së ndërtimit të stacionit policor në Zubin Potok, stacion ky që i ka munguar me dekada kësaj komune e këtij qyteti. Ashtu siç po punojmë në vazhdimësi ta rrisim nivelin e sigurisë qoftë nacionale, qoftë asaj publike, po ashtu po punojmë shumë që kushtet e punës për Policinë e Kosovës të përmirësohen, po ashtu edhe për qytetarët, të cilët pa kurrfarë pengese apo vështirësie e hezitimi mund t’i drejtohen Policisë”, ka thënë Sveçla.
Sveçla deklaroi se i gjithë projekti do të finalizohet shumë shpejt.
“Në një afat shumë të shpejt, ashtu siç biseduam edhe me punëkryesin, shumë më shpejtë se plani i planifikimit me infrastrukturë shtesë për sigurinë e tyre me më shumë shërbime për një jetë më të mirë për të gjithë pa asnjë dallim”, ka thënë tutje Sveçla.
E në anën tjetër, kryetari i Zubin Potokut, Izmir Zeqiri u shpreh falënderues.
“ Dua të falënderoj ministrinë e Punëve të Brendshme në krye me ministrin Sveçla, për punët që po i bënë, të nevojshme dhe të domosdoshme për të gjithë qytetarët ky objekt që sot po fillon. Dihet me dekada, Policia dhe stacioni policor i komunës së Zubin Potokut ka operuar nga objektet privat dhe duke pagua qera bukur të shtrenjta. Tani më e tutje, do ta ketë kuadraturën e nevojshme të operimit si stacion policor, që është mëse i nevojshëm sepse dihet që esenciale është Policia e Komunës e qytetarit që i shërben sigurisë së qytetarit” , ka thënë Izmir Zeqiri.
Ndërtimi i stacionit të ri të Policisë kap vlerën prej 1.1 milionë euro, shumë kjo që është ndarë nga Qeveria e Kosovës.
Deri në përfundimin e tij, qytetarët e kësaj zone, shërbimet do t’i marrin në një objekt alternativ.
