Autoritetet iraniane njoftuan të hënën se të paktën 935 persona janë vrarë nga sulmet izraelite gjatë një konflikti 12-ditor mes Iranit dhe Izraelit.
Sipas zëdhënësit të Autoritetit Gjyqësor, Asghar Jahangir, viktimat përfshijnë 132 gra dhe 38 fëmijë. Deklarata e tij u publikua nga agjencia gjysmëzyrtare e lajmeve Tasnim.
Më herët, Ministria iraniane e Shëndetësisë raportoi 606 të vrarë dhe 5,332 të plagosur nga sulmet ajrore izraelite. Ndërkohë, Jahangir theksoi se një prej goditjeve më të rënda ndodhi në burgun Evin në veriperëndim të Teheranit, ku humbën jetën 79 persona – përfshirë të burgosur, punonjës të institucionit dhe banorë lokalë.
Ai tha se burgu është bërë i paoperueshëm dhe se të burgosurit janë evakuuar. Jahangir e përshkroi sulmin si një “shkelje flagrante të të drejtave themelore të njeriut dhe të ligjeve ndërkombëtare”, ka shkruar Anadoly.
Konflikti nisi më 13 qershor, kur Izraeli ndërmori sulme ajrore mbi objekte ushtarake, bërthamore dhe civile në Iran. Shtetet e Bashkuara u përfshinë gjithashtu, duke bombarduar objektet bërthamore iraniane në Fordo, Natanz dhe Isfahan, çka përshkallëzoi ndjeshëm tensionet.
Në përgjigje, Teherani nisi një seri sulmesh hakmarrëse me raketa dhe dronë kundër territorit izraelit, duke vrarë të paktën 29 persona dhe duke plagosur mbi 3,400 të tjerë, sipas të dhënave të publikuara nga Universiteti Hebraik i Jerusalemit.
Luftimet u ndalën më 24 qershor, pasi një armëpushim i ndërmjetësuar nga Shtetet e Bashkuara hyri në fuqi.
