Kryeministri në detyrë i Kosovës, Albin Kurti, ka paralajmëruar se pushteti aktual në Serbi mund të përdorë elemente destruktive për të nxitur incidente gjatë shënimit të Vidovdanit në Gazimestan këtë fundjavë.
Sipas Kurtit, qëllimi i Beogradit është të zhvendosë vëmendjen nga protestat antiqeveritare që po zhvillohen aktualisht në Serbi, përfshirë ato të studentëve dhe qytetarëve të pakënaqur me qeverisjen e Aleksandar Vuçiqit.
“Beogradi, që po përballet me protesta të studentëve dhe jo vetëm, po përpiqet ta zhvendosë vëmendjen diku tjetër. Në këtë përpjekje për të ulur përmasat e protestave në Beograd, pushteti në Serbi mund të shfrytëzojë elemente destruktive për të nxitur incidente në Gazimestan”, deklaroi Kurti.
Ai bëri të ditur se, sipas vlerësimeve të institucioneve të sigurisë dhe inteligjencës së Kosovës, janë organizuar grupe serbësh nga Serbia, Mali i Zi dhe Bosnja e Hercegovina për të udhëtuar drejt Kosovës me qëllim pjesëmarrjeje në tubimin në Gazimestan.
“Tradicionalisht, grupe të tilla janë treguar provokuese, duke bartur simbole nacionaliste serbo-ruse që bien ndesh me Kushtetutën e Republikës së Kosovës,” shtoi Kurti.
Në përfundim, kryeministri në detyrë u bëri thirrje qytetarëve të Kosovës, e veçanërisht komunitetit serb, që të mos lejojnë të keqpërdoren për qëllime politike, si dhe të gjithë qytetarëve që të mos bien pre e asnjë provokimi.
