Një nga trendet më të spikatura të kësaj vere vjen nga një element që na kujton fëmijërinë: sandalet me rripa, që rikthehen në një version të ri, modern dhe mjaft stil.
Ky model i veçantë po fiton gjithnjë e më shumë popullaritet dhe pritet të bëhet pjesë e pandashme e kombinimeve të përditshme të grave këtë sezon.
Sipas stilistëve, sandalet me rripa përfaqësojnë përzierjen perfekte mes sportives dhe urbanes.
Të frymëzuara nga pajisjet e alpinistëve, ato zëvendësojnë rripat klasike prej lëkure me litarë të hollë, duke krijuar një pamje origjinale dhe të guximshme.
Ky model gjendet në ngjyra neutrale si e zeza dhe kafeja, por gjithnjë e më shpesh ofrohet në nuanca të ndezura si portokallia, e kuqja apo jeshilja, duke shtuar më shumë gjallëri në çdo kombinim veror.
Sandalet mund të kombinohen lehtësisht me pantallona të shkurtra të tipit Bermuda, bluza pa mëngë, këmisha të zbërthyera prej liri ose veshje të tjera të lehta dhe komode.
Ato përshtaten po aq bukur edhe me minifunde xhins, funde maksi apo fustane verorë, duke i dhënë çdo veshjeje një prekje të çlirët dhe moderne.
Ky model tashmë ka filluar të dominojë koleksionet e dyqaneve dhe, me shumë gjasë, do të bëhet një nga blerjet më të dëshiruara të këtij sezoni.
Sandalet apo shapkat ofrojnë jo vetëm stil, por edhe rehati dhe fleksibilitet në kombinime – një zgjedhje ideale për verën që kemi përpara./TAR
