Oda e Përmbaruesve Privat të Kosovës (OPPK), thotë se vendimi i Gjykatës Komerciale në rastin e Telekomit kërcënon themelet e sigurisë juridike të Kosovës.
Kjo Odë ka reaguar ndaj Aktvendimit KPPP.nr.500/2025 të datës 13 qershor 2025, me të cilin gjyqtari Arben Toska ka urdhëruar përmbaruesin privat Flamur Bogaj që të kthejë shumën prej 4,483,945.30 euro.
“Rasti konkret lidhet me zbatimin e një vendimi të formës së prerë të Arbitrazhit Ndërkombëtar të Odës Ekonomike Ndërkombëtare (ICC) në Londër, i cili më parë ishte njohur dhe shpallur i ekzekutueshëm nga vetë Gjykata Komerciale. Debitori në këtë rast, Telekomi i Kosovës Sh.A., kishte shfrytëzuar të gjitha mjetet juridike deri në Gjykatën Supreme, por urdhri për lejimin e përmbarimit ishte lënë në fuqi në të gjitha instancat”, thuhet në reagim.
OPPK thotë se mjetet e arkëtuara nga debitori i janë transferuar kreditorit në përputhje me ligjin dhe përmbaruesi nuk mund të urdhërohet t’i kthejë ato.
“Oda thekson se ky vendim është në kundërshtim flagrant me ligjin, pasi përmbaruesi privat është organ përmbarues, njëjtë si Gjykata kur vepron si organ përmbarues për çështjet e kthimit të punëtorëve në punë apo për çështjet familjare, siç përcaktohet në Ligjin e Procedurës përmbarimore, e jo palë në procedurë”, thuhet mes tjerash.
Sipas OPPK-së, ky vendim krijon precedentë të rrezikshëm duke e trajtuar përmbaruesin si palë dhe duke i ngarkuar një detyrim në mënyrë të paligjshme.
Bordi Ekzekutiv i Odës i bën thirrje Këshillit Gjyqësor të Kosovës dhe Dhomave të Shkallës së Dytë të Gjykatës Komerciale që të ndërhyjnë për të korrigjuar këtë, siç e quajnë ata, “vendim skandaloz”.
Reagimi i Bordit Ekzekutiv të Odës së Përmbaruesve Privat të Kosovës:
