Instituti për Drejtësi, Edukim dhe Avancim (IDEA) ka publikuar një raport që nxjerr në pah pabarazitë e mëdha në financimin e sportit në Kosovë. Sipas të dhënave të periudhës 2021–2024, mbi 70% e sponsorizimeve shkojnë në futboll dhe basketboll, kryesisht në ekipet e meshkujve. Ndërkohë, klubet e femrave dhe kategoritë e reja përfitojnë vetëm rreth 5% të fondeve.
Zëvendësministrja në detyrë e Kulturës, Rinisë dhe Sportit, Daulina Osmani, vlerësoi rëndësinë e këtij raporti për rishikimin e ligjit të sponsorizimeve dhe për avancimin e barazisë gjinore në sport.
Hulumtuesit nënvizuan se pabarazia në financim dhe moszbatimi i ligjit për sponsorizime po dëmtojnë zhvillimin e sportit, veçanërisht për vajzat dhe të rinjtë, që janë thelbësorë për të ardhmen sportive të Kosovës.
IDEA apelon për ndryshime urgjente në politikat financiare, sidomos në prag të organizimit të Lojërave Mesdhetare Prishtina 2030.
