Raportohet se është sulmuar me kallashnikov shtëpia e Liridon Osmanit, qytetarit i cili para pak javësh ishte sulmuar fizikisht nga disa persona të maskuar, derisa ishte duke dërguar vajzën e tij në çerdhe.
Policia e Kosovës në raportin 24-orësh të saj ka bërë të ditur se sulmi ka ndodhur të shtunën rreth orës 22:55 në rrugën “Vëllezërit Gërvalla” në Vushtrri.
Sipas raportit policor, Osmani ka njoftuar se një i panjohur ka shtënë me armë zjarri në drejtim të shtëpisë së tij dhe është larguar në drejtim të panjohur.
Përveç dëmeve materiale, nuk raportohet për të lënduar, ndërsa në vendin e ngjarjes thuhet se janë gjetur dhe konfiskuar disa gëzhoja dhe plumba të pa shkrepur.
Lidhur me rastin është lajmëruar prokurori dhe hetimet tashmë kanë nisur.
“Rr. Vëllezërit Gërvalla, Vushtrri 21.06.2025-22:55. Ankuesi m/k ka raportuar se një i dyshuar i panjohur ka shtënë me armë zjarri në drejtim të shtëpisë së tij dhe është larguar në drejtim të panjohur. Për veç dëmeve materiale, nuk raportohet për të lënduar, ndërsa në vendin e ngjarjes janë gjetur dhe konfiskuar disa gëzhoja dhe plumba të pa shkrepur. Lidhur me rastin është njoftuar prokurori. Rasti nën hetime”, thuhet në raportin e Policisë.
