Politologu Avdi Smajljaj ka vlerësuar se ndërtimi i urave mbi lumin Ibër përfaqëson më shumë sesa një projekt infrastrukturor – ai thotë se është një hap i domosdoshëm drejt integrimit të qytetarëve dhe normalizimit të jetës në veri të Kosovës.
Sipas tij, ndërtimi i urave duhet të shihet si pjesë e obligimeve të shtetit të Kosovës për të përfshirë të gjithë qytetarët në institucionet shtetërore dhe në jetën shoqërore e politike.
Ai gjithashtu theksoi se projektet e tilla duhet të shihen me sy pozitiv edhe nga bashkësia ndërkombëtare, si infrastrukturë që forcon lidhjen mes komuniteteve.
Smajljaj vuri në dukje se në të kaluarën ka pasur përpjekje për hapjen e urës së Mitrovicës, por ka munguar mbështetja e plotë ndërkombëtare.
“Urat ndihmojnë integrimin e qytetarëve, shteti i Kosovës ka për obligim që t’i integrojë të gjithë qytetarët e vetë në institucione në jetën shoqërore, politike dhe urat i shërbejnë kësaj fryme dhe këtij obligimi që ka shteti i Kosovës. Këto ura duhet të shihen edhe nga komuniteti ndërkombëtar, infrastrukturë, logjistikë e cila i shërben rritjes ose intensitetit të bashkëveprimit në mes të qytetarëve që është e domosdoshme edhe për qytetarët që jetojnë aty dhe për komunat. Ne e kemi parë që kur ka pas përpjekje që të hapet Ura, kemi parë rolin e komunitetit ndërkombëtar që njëfarë mënyre nuk ka qenë e pajtimit dhe besoj që këto institucione duhet ta shtojnë intensitetin e punës së vetë. Kosova dhe shumë qytetarë që jetojnë atje kanë kaluar një kohë të gjatë dhe kanë nevojë që t’i kthehen normalitetit”, tha ai në emisionin “Këndi i Debatit” në Tëvë1.
