Një pjesë të ekzaminimeve, i akuzuari për vrasjen e bashkëshortes së tij, Liridona Ademaj, Naim Murseli i bëri të premten në Klinikën e Neurologjisë.
Televizioni ka mësuar se brenda kësaj klinike, Murseli e ka bërë një CT.
Për këto ekzaminime, më 9 qershor lëshoi urdhëresë Gjykata Themelore në Prishtinë.
“Me datë 09.06.2025 trupi gjykues në këtë çështje penale ka lëshuar Urdhëresë përmes së cilës është urdhëruar Instituti i Psikiatrisë Forenzike në Prishtinë të bëjë Ekzaminimin Psikiatrik për të akuzuarin N.M”, tha zëdhënësja e Gjykatës Themelore në Prishtinë, Mirlinda Gashi.
Drejtori i Klinikes, Shpend Haxhibeqiri tha se qëndrimi i tij në klinikë do të vazhdoj.
“Murseli do të qëndrojë në institut deri sa të bëhet ekzaminimi i plotë i tij, dhe deri kur mjekët e vlerësojnë se është i mjaftueshëm qëndrimi i tij aty”, tha drejtori i Institutit Psikiatrik të Forenzikes, Shpend HaxhiBeqiri.
Krejt këto zhvillim po i ndjek më vëmendje familja e të ndjerës, Liridona Ademaj.
“Kjo tendencë për te zvarritur e keqpërdorur hapat procedurale te përfundojë sa me shpejte dhe kështu te mund te vazhdohet me gjykimin ne seance gjyqësore. Konsiderojmë se tendenca për te mënjanuar veten nga gjykimi është keqpërdorimi i procedurave përmes ushtrimit te kërkesave ligjore te cilat nuk i kundërshtojmë qe te kryhen, por tregojnë për vete fajësinë e te akuzuarit dhe shfrytëzimin e te gjitha mjeteve qe janë ne dispozicion brenda e jashtë dispozitave ligjore”, tha vëllau i Lirirdonës, Leonard Ademaj.
Avokatja e Murselit, Teuta Zhinipotoku ka thënë që aktualisht nuk ka ndonjë informacion zyrtar për kohëzgjatjen e qëndrimit të z. Naim Murseli në Institutin e Psikiatrisë, siç ka thënë ajo, nëse ai është realisht i shtruar atje.
“Aktualisht nuk ka ndonjë informacion zyrtar për kohëzgjatjen e qëndrimit të z. Naim Murseli në Institutin e Psikiatrisë, nëse ai është realisht i shtruar atje. Zakonisht, në raste kur Gjykata urdhëron ekspertizë psikiatrike, qëndrimi mund të zgjasë disa ditë deri në disa javë, në varësi të kompleksitetit të vlerësimit dhe rekomandimeve të profesionistëve shëndetësorë.Kohëzgjatja përcaktohet nga nevoja për vlerësim të plotë dhe vendimi final i mjekëve”, tha Zhinipotoku.
Seanca e radhës për vrasjen e Liridona Ademajt do të mbahet më 2 korrik në Gjykatën Themelore në Prishtinë.
