Korporata Energjetike e Kosovës ka njoftuar se në mënyrë të paplanifikuar, njësia A3 e Termocentralit Kosova A ka dalë nga sistemi, të enjten rreth orës 00:30.
Sipas KEK-ut, kjo ndalesë është shkaktuar si pasojë e luhatjeve në sistemin elektrik, me ç ‘rast ka reaguar sistemi mbrojtës i gjeneratorit, duke shkaktuar ndërprerjen automatike të zgjueses.
Përmes njoftimit KEK-u po ashtu ka bërë të ditur se në njësinë A5 të TC Kosova A, më 17 qershor është vërejtur humbje e ujit në kaldajë.
“Ekipet teknike kanë monitoruar nga afër situatën dhe e kanë mbajtur njësinë në funksion deri më 18.06.2025 në ora 00:02, kur ajo është ndalur me qëllim të evitimit të ndonjë avarie të përmasave më të mëdha”, thuhet në njoftim.
Ndërkohë, njësia A4 e TC Kosova A thuhet se ndodhet në remont që nga data 16 maj.
“Menaxhmenti i KEK sh.a. është i përkushtuar që, përtej adresimit teknik të situatës, të vendoset një standard i lartë i përgjegjësisë dhe llogaridhënies në të gjitha nivelet operuese, si parakusht për garantimin e stabilitetit të sistemit prodhues dhe të besueshmërisë ndaj publikut. KEK sh.a. siguron opinionin se po ndërmerren të gjitha masat teknike dhe organizative për rikthimin sa më të shpejtë të njësive në funksion, në bashkëpunim të ngushtë me të gjithë aktorët relevantë të sektorit energjetik në vend”, theksohet në njoftim.
