Ligjëruesi në Universitetin e Hamburgut, Mirsad Voca ka deklaruar se momentalisht ka në rrezik të fillimit të përplasjeve direkte mes fuqive të mëdha.
Mirëpo, Voca beson që do të ketë një lloj diplomacie më të fuqishme që do t’i kundërvihet këtyre përplasjeve.
Ai mohoi se ka filluar një lloj lufte e tretë botërore.
“Nuk është e vërtetë që ka filluar Lufta e Tretë Botërore. Kemi të bëjmë me luftëra përfaqësuese prapa të cilave i kemi fuqitë e mëdha botërore dhe jemi në një rrezik të madh tani që të kemi një përplasje direkte mes fuqive të mëdha, mirëpo besoj se do të ketë një lloj diplomacie më të fuqishme në mënyrë që t’I kundërvihet këtyre përplasjeve dhe që të futemi në faza diplomatike ku do të mund ta evitonim një përplasje direkte mes fuqive të mëdha kështu që nuk jemi ende në një Luftë të Tretë Botërore”, ka thënë në “Këndin e Debatit” në Tëvë1.
Ai ka shtuar se, me rikthimin e Donald Trump në pushtet, Kosova duhet të jetë e përgatitur për dinamika të shpejta dhe të paparashikueshme që mund të shkaktohen nga politikat e tij.
“Me ardhjen e presidentit Trump kemi dinamika të shpejta, ky dëshiron marrëveshje fituese dhe është i paparashikueshëm dhe kjo paparashikueshmëri ka edhe rreziqe shumë më të mëdha. Rrezikon aspektin e diplomacisë sepse Trump është i njohur për zgjidhje të shpejta dhe dëshiron të ketë sukses. Përballë kësaj situate Kosova duhet të jetë shumë e përgatitur të tregoj një unitet shumë më të fuqishëm sesa çdo herë më parë që kjo tani për tani nuk po shihet fatkeqësisht”, ka theksuar Voca.
