Për masakrën e Mejës, njërin ndër krimet mizore që u krye nga nga forcat ushtarake, policore e paramilitare serbe në Kosovë, ka nisur beteja e drejtësisë.
53 të akuzuarit, deri tani të paarritshëm për institucionet e drejtësisë, do të gjykohen në mungesë.
Për ta, të hënën në Gjykatën Themelore në Prishtinë, u paraqitën mbrojtësit e tyre.
53 të akuzuarit, ish pjesëtarë të policisë, ushtrisë e inteligjencës serbe, sipas aktakuzës së Prokurorisë Speciale, janë përgjegjës për vrasjen e 370 civilëve shqiptarë, në dhjetëra fshatra të komunës së Gjakovës.
Prokurori Special, Ilir Morina, tregoi se si dyshohet të jetë planifikuar e gjithë kjo ofensivë e ushtrisë serbe.
Për këta 53 të akuzuarit, janë lëshuar fletëarrestime ndërkombëtare.
Përpos vrasjes, sipas aktakuzës së Prokurorisë Speciale, u bë edhe dëbimi i 20 mijë civilëve, ku njëkohësisht u dogjën shtëpitë e tyre dhe u plaçkitën.
Në këtë proces, si palë e dëmtuar janë 217 persona, kurse si dëshmitarë të Prokurorisë Speciale, janë propozuar 43 dëshmitarë.
