Inspektoriati Policor i Kosovës ka njoftuar se është arrestuar një zyrtar policor i dyshuar për veprën penale “keqtrajtim gjatë ushtrimit të detyrës zyrtare” dhe “lëndim i rëndë trupor”.
Sipas IPK-së, ngjarja është raportuar të ketë ndodhur të dielën në Prizren kur një qytetar ishte ndaluar nga policia fillimisht për një kundërvajtje në trafik.
“Rasti është regjistruar në IPK dhe hetuesit janë angazhuar duke ndërmarrë veprime konkrete hetimore përfshirë shikimin e video-incizimeve të kamerave të sigurisë, identifikimin e dëshmitarëve të mundshëm dhe intervistimin e zyrtarit policor të dyshuar në këtë rast. Pas disa veprimeve hetimore në konsultim me Prokurorinë Themelore në Prizren, hetuesit e IPK-së kanë arrestuar një zyrtar policor që ishte përfshirë në këtë incident”, thuhet në njoftim.
Të dyshuarit, me vendim të prokurorit i është caktuar masa e ndalimit për 48 orë, si dhe është suspenduar nga detyra.
